पाचोरा, दि. 25 – तालुक्यातील सार्वे-जामने गावात मोठ्या प्रमाणात डेंग्यूचे रुग्ण आढळून येत आहेत. दरम्यान माजी सरपंच संजय पाटील यांनी पुढाकार घेऊन आमदार गिरीश महाजन यांच्या माध्यमातून गावातील रुग्णांसाठी मोफत आरोग्य तपासणी शिबिर घेण्यात आले.
या शिबिरात रुग्णांची रक्त तपासणी करून रुग्णांना मोफत औषधी देण्यात आली. यावेळी 250 रुग्णांची रक्त तपासणी तर साधारण 300 रुग्णाची आरोग्य तपासणी करण्यात आली. यावेळी गावातच आरोग्य शिबिर घेतल्याने ग्रामस्थांनी समाधान व्यक्त करत आयोजकांचे आभार मानले.
शिबिरा प्रसंगी प्रमुख पाहुणे म्हणून माजी जिल्हा परिषद सदस्य शांताराम सोनजी पाटील, ग्रामपंचायत सदस्य संजय आबा पाटील, डॉ.महेंद्र चव्हाण, डॉ.मयुरी पवार, डॉ.योगेश डाखणे, जी.एम. फौंडेशनचे आरोग्यदूत पितांबर भावसार, अनिल सोनवणे उपस्थित होते. शिबीर यशस्वीतेसाठी ग्लोबल महाराष्ट्र हॉस्पिटल व सार्वे-जामने ग्रामस्थ यांनी सहकार्य केले.
