जळगाव, दि. 23 – गेंदालाल मिल येथील रहिवासी कै. शंकर मधुकर निकम यांचा दिनांक 11 ऑगस्ट 2021 रोजी शासकीय वैद्यकीय महाविद्यालय, जळगाव येथे उपचारादरम्यान झालेल्या मृत्यूची चौकशी होऊन सदर घटनेस जबाबदार असणाऱ्या संबंधित डॉक्टर व परिचारिका यांच्यावर योग्य कायदेशीर कारवाई करण्यात यावी, या मागणीसाठी जिल्हाधिकारी कार्यालया समोर उपोषण करण्यात आले होते.
निकम कुटुंबियांना न्याय मिळावा या मागणीसाठी मयत शंकर निकम यांची आई श्रीमती सुमनबाई निकम व पत्नी श्रीमती रेखा निकम या दोन्ही दिनांक 20 ऑक्टोबर 2021 पासुन आमरण उपोषणाला बसल्या असुन त्यांच्यासोबत मयत शंकर निकम यांची 3 वर्षांची चिमुरडी मुलगी देखील बसली होती. दरम्यान शंकर निकम यांच्यावर चुकीचे उपचार करत डॉक्टरांनी हलगर्जीपणा केला असल्याचा आरोप करण्यात आला.
सदर उपोषणाची दखल घेत जिल्हाधिकारी अभिजित राऊत यांनी मयत शंकर निकम यांच्या मृत्युची चौकशी करण्यासाठी समिती गठीत केली असुन, समितीत शासकीय वैद्यकीय महाविद्यालय जळगाव व काही खाजगी तज्ञ डॉक्टर्स यांचा समावेश असणार आहे. ही समिती 8 दिवसात अहवाल सादर करेल व त्या अहवालात जे कुणी दोषी असतील त्यांची गय केली जाणार नाही. त्यांच्यावर योग्य कायदेशीर कारवाई करण्यात येईल असे लेखी व प्रत्यक्ष चर्चेत जिल्हाधिकारी राऊत यांनी आश्वासन दिले असल्याचे अमोल कोल्हे यांनी सांगितले.
आंदोलकांच्या वतीने छावा मराठा युवा महासंघाचे जिल्हाध्यक्ष अमोल कोल्हे, मंगल भालेराव, श्रावण अहिरे, संजय निकम, भैय्या निकम, श्रावण सपकाळे यांनी जिल्हाधिकारी अभिजात राऊत यांच्याशी चर्चा केली. अमोल कोल्हे यांच्या हस्ते उपोषणकर्त्यांना सरबत देऊन उपोषण तूर्त स्थगित करण्यात आले. निकम कुटुंबियांना न्याय न मिळाल्यास छावा मराठा युवा महासंघातर्फे न्यायालयात दाद मागणार येणार आहे.
