चाळीसगाव, (प्रतिनिधी) : चाळीसगाव मतदारसंघात महायुतीचे उमेदवार आ. मंगेश चव्हाण यांनी प्रचारात आघाडी घेत, घरोघरी जाऊन मतदारांच्या भेटीगाठी घेण्यावर भर दिला आहे. विशेष म्हणजे नागरिकांकडून देखील आ. चव्हाण यांचे उस्फुर्त स्वागत होत असून दारोदारी महिला भगिनी रांगोळ्या काढून आनंदाने स्वागत करत आहेत. प्रत्येक ठिकाणी औक्षण करून विजयासाठी आशिर्वाद मिळत असून आतापर्यंत जवळपास ७० टक्के प्रचार आ. मंगेश चव्हाण यांनी पुर्ण केल्याचे दिसून येत आहे.
आ.मंगेश चव्हाण हे शहरात प्रचार करत असतांनाच त्यांच्या पत्नी प्रतिभा चव्हाण यादेखील ग्रामीण भागात जिल्हा परिषद गट आणि पंचायत समिती गणाप्रमाणे अतिशय नियोजनबद्ध प्रचाराची धुरा सांभाळत आहेत. आ.मंगेश चव्हाण यांची प्रचार यंत्रणा आणि सुक्ष्म नियोजनाचे सर्वत्र कौतुक होत आहे.
दुसरीकडे कमी वेळ असल्याने सर्व मतदारांपर्यंत कसं पोहोचता येईल या विचाराने राज्यातील बहुतेक उमेदवार विचारात पडलेले दिसत आहेत.पण चाळीसगाव मतदारसंघातील महायुतीचे उमेदवार आ. मंगेश चव्हाण हे मात्र याबाबत निश्चिंत दिसत असून जनतेकडून देखील अतिशय चांगला प्रतिसाद त्यांना मिळत आहे. त्यांच्यासोबत महायुतीतील सर्वच पक्षांचे पदाधिकारी व कार्यकर्ते आणि मित्रपरिवार देखील मोठ्या उत्साहाने प्रचारात उतरले आहेत.
