धरणगाव, (प्रतिनिधी) : जळगाव ग्रामीण विधानसभा मतदारसंघाचे उमेदवार गुलाबराव पाटील यांच्या प्रचारार्थ त्यांचे दोन्ही पुत्र हे शेकडो युवकांना सोबत घेवून गावो- गावच्या प्रत्येक गल्लीतून प्रचार करीत आहेत. “गुलाबराव पाटील हे केवळ आमचे वडील नाहीत, तर ते या मतदार संघाचे भूमिपुत्र असून त्यांनी केलेल्या विकास कामांसाठी आपले आशीर्वाद व खंबीर साथ द्यावी अशी भावनिक साद या दोन्ही भावंडांच्या वतीने घालण्यात येत आहे. विकासाच्या ध्येयाशी जोडलेली ही भावनिक साद मतदारांच्या हृदयात नवी उर्जा आणि नवीन आशा निर्माण करत असल्याचे प्रत्येक गावातून जनतेच्या मिळालेल्या प्रतिसादातुन दिसून येत आहे.
मंत्री गुलाबराव पाटील यांचे पुत्र, जिल्हा परिषद सदस्य प्रतापराव पाटील व लघुउद्योजक विक्रम पाटील या दोन भावांचा तीन दिवसात चांदसर, दोनगाव बु., टहाकळी, आव्हाणी, भोकणी, पथराड बु. पथराड खु., लाडली, फुलपाट, पाळधी बु., पाळधी खु., धार, शेरी, कवठळ, दुसखेडा, एकलग्न, पोखरी तांडा, दोनगाव खु. झुरखेडा, निमखेडा, तारखेडा सह इतर २२ गावांमध्ये झंझावाती प्रचार करून मतदारांशी संवाद साधला. यावेळी मतदारांनी गुलाबराव पाटील यांना आशीर्वाद देऊन भक्कम पाठबळ असल्याची ग्वाही दिली. धनुष्यबाण व गुलाबराव पाटील व नेत्यांचे लहान मोठे कट-आउट, भगवे रुमाल, टोप्या व मुखवटे यांचा उपयोग केल्याने प्रचार रॅलीत युवकांचा उत्साह व जनतेचा प्रतिसाद मोठ्या प्रमाणात दिसून येत होता. प्रचार रॅलीमध्ये पदाधिकारी, कार्यकर्ते व नागरिक मोठ्या संख्येने उपस्थित होते.
