जळगाव (प्रतिनिधी ) : शहरातील शिवाजी नगर परिसरातील धनाजी काळे नगरात राहत असलेल्या गणेश बबनराव कोळी (वय ३०) या तरुणाने राहत्या घरात गळफास घेत आपली जीवनयात्रा संपविली. ही घटना शुक्रवार दि. ९ ऑगस्ट रोजी सायंकाळी सहा वाजेच्या सुमारास उघडकीस आली.
गणेश कोळी हा तरुण समाजसेवक म्हणून काम करीत होता. घरी असतांना सायंकाळच्या सुमारास गणेश याने छताला गळफास घेत आपली जीवनयात्रा संपविली. त्यांचा पुतण्या हा घरी आला असता, त्याला काका गणेश हे गळफास घेतलेल्या अवस्थेत दिसून आले. त्याने आरडाओरड करीत घटनेची माहिती कुटुंबियांना दिली.
त्यास शासकीय वैद्यकीय महाविद्यालय व रुग्णालयात दाखल केले असता याठिकाणी वैद्यकीय अधिकाऱ्यांनी तपासणी करीत मयत घोषीत केले. तरुणाच्या आत्महत्येचे कारण अस्पष्ट असून याप्रकरणी रात्री उशिरापर्यंत शहर पोलिसात अकस्मात मृत्यूची नोंद करण्याचे काम सुरु होते. गणेशच्या पश्चात पाच भाऊ, वहिनी असा परिवार आहे.
