जळगाव, दि.10 – जळगाव शहराला पाणीपुरवठा करणारे वाघूर धरण यंदा वरुणराजाच्या कृपादृष्टीमुळे 100 टक्के पूर्ण भरले आहे. त्या अनुषंगाने हिंदू संस्कृतीची जपणूक करीत कृतज्ञता म्हणून गुरुवारी धरणाचे जलपूजन करण्यात आले.
महापौर जयश्री महाजन, उपमहापौर कुलभूषण पाटील, गजानन मालपुरे यांच्या प्रमुख उपस्थितीत जलपूजन केले. दरम्यान मेहरुण परिसरातील रहिवासी युवराज तांबे व वंदना तांबे या दाम्पत्याला जलपूजनाचा मान देण्यात आला. यावेळी तांबे दाम्पत्याने सपत्नीक साडीचोळी, श्रीफळ, पुष्पहार अर्पण करून जलपूजन केले. यावेळी महापालिकेतील पाणीपुरवठा विभागाचे उपअभियंता व केमिस्ट श्यामकांत भांडारकर, विद्युत अभियंता विलास पाटील उपस्थित होते.
याप्रसंगी तांबे दाम्पत्यासह महापौर जयश्री महाजन यांनी वाघूर धरण यापुढेही सदैव 100 टक्के भरून या धरणाच्या पाण्यावर विसंबून असलेल्या जळगाव शहरासह जामनेर, भुसावळ तसेच अन्य परिसरातील गावांना लाभ मिळू द्यावा व सर्वत्र सुख-समृद्धी नांदावी, अशी आर्त आळवणी वरुण देवता चरणी केली. वाघूर धरणाचे बांधकाम 1978 मध्ये झाल्यापासून आतापर्यंत धरण तीन वेळा 100 टक्के भरले आहे.
