जळगाव, प्रतिनिधी : महानगरपालिकेने कचरा संकलनासाठी नियुक्त केलेल्या बीव्हीजी कंपनीच्या भोंगळ कारभारावर स्थायी समितीच्या सभेत तीव्र संताप व्यक्त करण्यात आला आहे. कंपनीच्या हमीपत्रात स्वतःची ५० वाहने असल्याचे नमूद असताना जोडलेल्या यादीत सुमारे १०० वाहनांचे क्रमांक आहेत, आणि याशिवाय महापालिकेची १२० हून अधिक वाहने वापरण्यासाठी दिली असतानाही प्रत्यक्षात कचरा उचलण्यासाठी गाड्या उपलब्ध होत नसल्याचा गंभीर मुद्दा नगरसेवक अरविंद देशमुख यांनी मांडला.
कंपनीला आतापर्यंत २५ कोटी रुपयांहून अधिक देयके अदा केल्यानंतरही नागरिकांना दुर्गंधी व अस्वच्छतेचा सामना करावा लागत आहे. कागदावर दाखवलेली वाहने प्रत्यक्षात कुठे आहेत, असा सवाल करत देशमुख यांनी वाहनांची उपलब्धता, देखभाल-दुरुस्ती आणि खर्चाचा सविस्तर हिशेब मागितला आहे.
पूर्वी खासगी वजनकाट्यावर होणाऱ्या कचऱ्याच्या वजनात महापालिकेचा स्वतःचा वजनकाटा सुरू झाल्यानंतर लक्षणीय घट झाल्याचे सांगत, वजनपावत्या आणि संकलनाच्या नोंदींची तुलनात्मक तपासणी करण्याची मागणीही त्यांनी केली. महापालिकेच्या वाहनांची देखभाल न झाल्यामुळे कोट्यवधी रुपयांचे नुकसान होत असून, या संपूर्ण प्रकरणाची संयुक्त चौकशी करून दोषींवर कठोर कारवाई करावी, अशी आक्रमक भूमिका सभेत घेण्यात आली.
