मुक्ताईनगर, (प्रतिनिधी) : तालुक्यातील घोडसगाव-चिखली शिवारात बुलढाणा जिल्ह्याच्या सीमेवर असलेल्या हॉटेल्समागील शेतात अश्लील चाळे सुरू असल्याच्या प्रकाराचा स्थानिक गुन्हे शाखेने पर्दाफाश केला आहे. बुधवारी रात्री मिळालेल्या गुप्त माहितीच्या आधारे एलसीबीच्या पथकाने अचानक टाकलेल्या छाप्यात १३ पुरुष आणि १० महिला अशा एकूण २३ जणांवर प्रतिबंधात्मक कारवाई करण्यात आली आहे.
मिळालेल्या माहितीनुसार, घोडसगाव-चिखली शिवारातील हॉटेलच्या मागील शेतात काही पुरुष आणि महिला अश्लील कृत्य करत अवैध कृत्य चालत असल्याची गोपनीय बातमी एलसीबीला मिळाली होती. या माहितीची तात्काळ दखल घेत पथकाने रात्रीच्या वेळी घटनास्थळी धाड टाकली. पोलिसांचा छापा पडताच परिसरात मोठी खळबळ उडाली. या कारवाईदरम्यान १० महिला आणि १३ पुरुषांना रंगेहात पकडण्यात आले असून, त्यांची चौकशी केली असता ताब्यात घेतलेल्या सर्व १० महिला या राजस्थान राज्यातील असल्याचे निष्पन्न झाले आहे.
सीमावर्ती भागाचा फायदा घेत शेतात लपून छपून चालवल्या जाणाऱ्या या अवैध व्यवसायावर एलसीबीने केलेल्या या धडक कारवाईमुळे परिसरातील बेकायदेशीर कामे करणाऱ्यांचे धाबे दणाणले आहेत. या प्रकरणातील सर्व संशयितांवर कायदेशीर प्रतिबंधात्मक कारवाई करण्यात आली असून, या रॅकेटचे मुख्य सूत्रधार कोण आहेत आणि इतर कोणाचा यात सहभाग आहे का, याचा अधिक तपास पोलीस करत आहेत.
