जळगाव, (प्रतिनिधी) : शहरात एक धक्कादायक प्रकार उघडकीस आला असून, एका १८ वर्षीय महाविद्यालयीन तरुणीला तिच्याच मैत्रिणीने ड्रग्ज आणि सिगारेटच्या व्यसनात अडकवून एका तरुणाच्या जाळ्यात ओढण्यास मदत केल्याची संतापजनक घटना घडली आहे. या प्रकरणी पीडितेच्या फिर्यादीवरून रामानंदनगर पोलीस ठाण्यात निर्मल दिनेश तिवारी (रा. प्रजापती नगर), जय चौधरी (रा. शिव कॉलनी) आणि गौरव पुरोहित यांच्याविरुद्ध ‘पोक्सो’सह विविध गंभीर कलमांन्वये गुन्हा दाखल करण्यात आला आहे.
पोलिसांत दिलेल्या तक्रारीनुसार, पीडित तरुणी आणि तिची मैत्रीण एकाच शाळेत शिकत होत्या. ऑक्टोबर २०२४ मध्ये मैत्रिणीने पीडितेला पहिल्यांदा सिगारेट दिली. त्यानंतर ऑगस्ट २०२५ मध्ये पीडितेचे आई-वडील गावाला गेलेले असताना, मैत्रिणीने तिला आरोपी निर्मल तिवारी याच्यासोबत कारमधून नेले. तिथे तिला सिगारेट, दारू व गांजाचे व्यसन लावण्यात आले. याच दरम्यान निर्मलने मोहाडी रोडवरील ट्रॅकवर कारमध्ये पीडितेला दारू पाजून तिच्यावर शारीरिक अत्याचार केले आणि तिचे नग्न फोटो काढले. हे फोटो सोशल मीडियावर व्हायरल करण्याची धमकी देऊन तो तिला वारंवार हॉटेलमध्ये बोलावून अत्याचार करत होता. इतकेच नव्हे तर, १९ फेब्रुवारी २०२६ रोजी निर्मलने तिला धमकी देऊन घरातून पळवून नेले आणि १५ एप्रिल २०२६ पर्यंत स्वतःच्या घरी डांबून ठेवले.
पीडितेने निर्मलच्या घरी पुन्हा जाण्यास नकार दिला असता, २७ मे २०२६ रोजी निर्मलचा मित्र गौरव पुरोहित याने तिला स्नॅपचॅटवर अश्लील मेसेज पाठवून तिचा विनयभंग केला. तसेच जय चौधरी नावाच्या तरुणाने पीडितेच्या घराच्या कंपाऊंडमध्ये दोन ते तीन वेळा ड्रग्ज आणून दिल्याचेही निष्पन्न झाले आहे. अखेर या त्रासाला कंटाळून पीडित तरुणीने वडिलांसह ३ जून रोजी रामानंदनगर पोलीस ठाण्यात रीतसर फिर्याद दिली असून, पोलीस या गंभीर प्रकरणाचा पुढील तपास करत आहेत.
