जळगाव, (प्रतिनिधी) : शहरातील शिवनेरी ग्रुप आणि पंकज पाटील मित्र परिवारातर्फे समाजसेवेचा वसा घेत भव्य रक्तदान शिबिर आणि धार्मिक कार्यक्रमाचे आयोजन करण्यात आले आहे. मंगळवार, दि. २ डिसेंबर रोजी भव्य रक्तदान शिबिर आणि गुरुवार, दि. ४ डिसेंबर रोजी दत्त जयंतीच्या पावन मुहूर्तावर भव्य कीर्तन सोहळा आयोजित करण्यात आला आहे. नागरिकांनी या सामाजिक आणि धार्मिक उपक्रमांना उत्साहाने उपस्थित राहावे, असे आवाहन आयोजकांनी केले आहे.
शिवनेरी ग्रुपचे प्रमुख पंकज पाटील यांच्या वाढदिवसानिमित्त या भव्य रक्तदान शिबिराचे आयोजन करण्यात आले आहे. हे शिबिर मंगळवार, दि. २ डिसेंबर रोजी संध्याकाळी ५ ते ८ या वेळेत शिव कॉलनी येथील चांदणी चौकातील मैदानात घेण्यात येणार आहे. विशेष म्हणजे, रक्तदानाला प्रोत्साहन देण्यासाठी यावेळी प्रत्येक रक्तदात्याला एक हेल्मेट भेट म्हणून वाटप केले जाणार आहे. नागरिकांनी मोठ्या संख्येने रक्तदान करून या सामाजिक कार्यात आपला सहभाग नोंदवावा, असे आवाहन संयोजकांनी केले आहे.
दत्त जयंतीनिमित्त कीर्तन सोहळा..
तसेच, श्री दत्त जयंतीच्या पावन मुहूर्तावर कीर्तनकार ह.भ.प. रविकिरण महाराज (दोंडाईचाकर) यांचे कीर्तन आयोजित करण्यात आले आहे. हा सोहळा गुरुवार, दि. ४ डिसेंबर रोजी रात्री ८ ते ११ वाजेपर्यंत याच चांदणी चौकातील मैदानात पार पडणार आहे. भाविकांनी या धार्मिक सोहळ्याला उपस्थित राहून महाराजांच्या अमृतवाणीचा लाभ घ्यावा, असे आवाहन शिवनेरी ग्रुप आणि पंकज पाटील मित्र परिवारातर्फे करण्यात आले आहे.
