पाचोरा, (प्रतिनिधी) : तालुक्यातील अंतुर्ली येथील शेत शिवारात शेततळ्यात तरुणांसह बालक मजुरांचा पाण्यात बुडून दुर्दैवी मृत्यू झाल्याची घटना आज दि. ८ मे रोजी सायंकाळी ५ वाजेच्या सुमारास उघडकीस आली आहे. पाचोरा पोलीस स्टेशनला अकस्मात मृत्यूची नोंद करण्यात आली आहे.
रवी परभत कोळी (वय १४, रा. पुनगाव ता. पाचोरा) असे बालकाचे तर पदमसिंग भगवान पाटील (वय २१, रा. अंतुर्ली बुद्रुक ता. पाचोरा) असे मयत तरुणाचे नाव आहे. पदमसिंग पाटील याचे पश्चात वृद्ध आई, एक विवाहित बहिण व रविंद्र कोळी याचे पश्चात आई, वडिल, दोन भाऊ असा परिवार आहे. गुरुवारी संध्याकाळी पाचोरा तालुक्यातील अंतुर्ली बुद्रुक शिवारात शेततळ्यात पडून दोन शेतमजुरांचा दुर्दैवी मृत्यू झाल्याची घटना घडली.
घटनेची माहिती मिळताच ग्रामस्थांनी घटनास्थळी धाव घेत दोघांना ग्रामस्थांच्या मदतीने पाचोरा ग्रामीण रुग्णालयात आणले असता डॉक्टरांनी तपासून मयत घोषित केले. याप्रकरणी पाचोरा पोलीस स्टेशन येथे अकस्मात मृत्यूची नोंद करण्यात आली आहे. घटनेचा पुढील तपास पाचोरा पोलीस स्टेशनचे पोलीस निरीक्षक अशोक पवार यांचे मार्गदर्शनाखाली पोलीस उपनिरीक्षक प्रकाश चव्हाणके करीत आहेत. या घटनेमुळे पाचोरा तालुक्यात शोककळा पसरली आहे.
