जळगाव (प्रतिनिधी) : धरणगाव तालुक्यातील पिंप्री येथील शाळांमधील ७१ विद्यार्थी प्री-डायबेटीक अर्थात मधुमेहपूर्व आढळून आल्याची धक्कादायक माहिती जिल्हा परिषदेच्या मुख्य कार्यकारी अधिकारी मिनल करणवाल यांनी आज पत्रकार परिषदेत दिली.
जिल्हा परिषदेच्या मुख्य कार्यकारी अधिकारी मिनल करनवाल यांच्या दालनात बुधवारी पत्रकार परिषद झाली. यावेळी सीईओ करणवाल यांनी सांगितले की, धरणगाव तालुक्यातील पिंप्री येथील प्राथमिक शाळा आणि कन्या शाळा यामधील इयत्ता १ ते ४थीच्या वर्गातील २४२ विद्यार्थ्यांची आरोग्य तपासणी करण्यात आली. या तपासणीत ७१ विद्यार्थी हे प्री-डायबेटीक अर्थात मधुमेहपूर्व असल्याचे आढळून आले आहे. आरोग्याच्या दृष्टीकोनातून हा आकडा मोठा असून जिल्हा परिषदेने याबाबत महत्वाचा निर्णय घेतला आहे.
धरणगाव तालुक्यातील पिंप्री या गावात झालेल्या तपासणीच्या धर्तीवर जून महिन्यात शाळा सुरू झाल्यानंतर जिल्ह्यातील प्राथमिक आरोग्य केंद्राच्या क्षेत्रातील एका शाळेतील विद्यार्थ्यांच्या आरोग्याची तपासणी करण्यात येणार असल्याचे सीईओ करणवाल यांनी सांगितले. तसेच व्हिल्स ग्लोबल फाउंडेशन या संस्थेसोबत करार करून ही मोहीम राबविण्यात येणार आहे. जंकफूडपासून विद्यार्थ्यांना दूर करण्यासाठी आहार बदलाची जनजागृती करावी लागणार आहे.
तसेच चपातीपेक्षा भाकरी बरी आणि फायबर असलले पदार्थ घरी देखिल देण्यासाठी पालकांमध्ये जागृती करण्यात येणार आहे. आहारात बदल केल्यास प्री-डायबेटीक विद्यार्थी या संकटातून निश्चीतपणे बाहेर पडतील असा विश्वासही सीईओ मिनल करणवाल यांनी पत्रकार परिषदेत व्यक्त केला. नाशिक, नंदुरबार याठिकाणी देखिल विद्यार्थ्यांच्या आहार बदलाबाबत जनजागृती करण्यात आली होती. त्याची प्रभावी अंमलबजावणी झाल्याने चांगले परिणाम दिसून आल्याचेही सीईओ करनवाल यांनी सांगितले.
