जळगाव, (प्रतिनिधी) : शहरातील शासनमान्य महात्मा गांधी पुस्तकालय आणि लेखक यांच्या संयुक्त विद्यमाने लेखक मिथुन ढिवरे यांच्या ‘जनमानसांतील तुकोबा’ पुस्तकाचे प्रकाशन शनिवारी पुस्तकालयाच्या हॉलमध्ये करण्यात आले. पुस्तकाचे प्रकाशन उमवि चे सिनेट सभासद प्रा. डॉ. साहेबराव भुकन यांच्या हस्ते करण्यात आले. यावेळी ऍड. आनंद मुजुमदार, प्रा. एन. व्ही. भारंबे, प्रा. दिगंबर कट्यारे यांची प्रमुख उपस्थिती होती.
दरम्यान प्रकाशक आणि मान्यवरांनी आपापले विचार पुस्तक आणि लेखक यांच्या विषयी मांडले. ‘वाचन संस्कृती टिकली पाहिजे आणि वाढली पाहिजे’ असा सर्वांच्या भाषणाचा सूर होता. आताच्या काळात सुद्धा जगद्गुरु संत तुकाराम महाराज यांच्या अभंगांचा शब्द आणि शब्द लागू पडतो असे मत प्रा. डॉ. साहेबराव भूकन यांनी मांडले.
कार्यक्रमात लेखक मिथुन ढिवरे यांचा स्वागत, सत्कार करण्यात आला. सूत्रसंचालन प्रा. डिगंबर सावकारे यांनी केले. पुस्तक अथर्व पब्लिकेशन्स, जळगाव यांनी छापले असून विक्रीसाठी सुद्धा उपलब्ध आहे. कार्यक्रमानंतर उपस्थितांना पुस्तकाची प्रत देण्यात आली.
