यावल, (प्रतिनिधी) : तालुक्यातील किनगाव येथे एका ३२ वर्षीय महिलेला तरुणाने कॉल केला असता महिलेने कॉल न उचलल्याने संतप्त युवकाने गुंडगिरी करून शिवीगाळ करत महिलेच्या मांडीवर धारदार शस्त्राने वार करत गंभीर दुखापत केल्याची घटना घडली. याप्रकरणी यावल पोलीस स्टेशनला गुन्हा दाखल करण्यात आला आहे.
मुकुंदा गणेश भंगाळे (वय ३२ वर्ष, रा. डांभूर्णी, ता.यावल) हा तरुण महिलेच्या घरात घुसला. मी तुला मोबाईल वर कॉल केला, तू माझा कॉल का उचलत नाही? असा प्रश्न करत तीला जाब विचारला. तेव्हा महिलेने संगितले की, माझा मोबाईल सायलेंट होता व मी बाहेर गेली होती, असे सांगितले असतानाही तरुणाने महिलेशी वाद घालत शिवीगाळ केली आणि महिलेच्या उजव्या पायाच्या मांडीवर धारदार चाकूने वार करून गंभीर दुखापत केली.
यावल तालुक्यातील किनगाव येथील मनीषा संदीप पाटील (वय ३२ वर्ष) या महिलेने यावल पोलिस स्टेशनला फिर्याद दिली आहे. महिलेने दिलेल्या तक्रारी वरून यावल पोलिस स्टेशनला मुकुंदा गणेश भंगाळे याच्याविरुद्ध गुन्हा दाखल करण्यात आला असून पुढील तपास पोलीस करीत आहेत.
