भरधाव बस थेट विद्युत खांबाला धडकली
धरणगाव, (प्रतिनिधी) : तालुक्यातील दोनगावपरिसरात स्मशानभूमीजवळ भरधाव बसवरील ताबा सुटल्याने बस थेट इलेक्ट्रिक खांब्यावर जाऊन धडकली. घटनेत प्रवाश्यांसह शालेय विद्यार्थी असे ३१ जण जखमी झाले आहे. घटना शुक्रवारी दि. १३ डिसेंबर रोजी घडली आहे. ही बस लाडली येथून निघून जळगाव येथे रेल मार्गे येत असताना हा अपघात झाला आहे.
धरणगाव तालुक्यातील लाडली गावात मुक्कामी असलेली बस क्रमांक (एमएच १४ बीटी २८८७) नेहमीप्रमाणे शुक्रवारी दि. १३ डिसेंबर रोजी सकाळी ५.३० वाजता लाडली येथून शाळकरी व महाविद्यालयीन विद्यार्थ्यांना घेऊन निघाली. पुढे रेल गावातील विद्यार्थ्यांना घेऊन पाळधीकडे येत असताना दोनगावाजवळील स्मशानभूमीच्या वळणाजवळ भरधाव बसवरील चालक अशोक जगन्नाथ पाटील (वय-५६, रा.लाडली ता.धरणगाव) यांचा बसवरील ताबा सुटल्याने वळणावरील इलेक्ट्रिक खांब्याला बस धडकली. बस थेट नाल्यात गेली असती पण सुदैवाने इलेक्ट्रिक खांब्याला धडकल्याने पुढील दुर्घटना टळली आहे. या अपघातात ३१ प्रवासी जखमी झाले आहेत.
दरम्यान, या घटनेची माहिती मिळाल्यानंतर लाडली, दोनगाव आणि रेल गावातील नागरिकांनी घटनास्थळी धाव घेऊन जखमींना तातडीने उतरवून जळगाव येथील शासकीय वैद्यकीय महाविद्यालयात उपचारासाठी दाखल करण्यात आले आहे. उपचार झाल्यावर बसने विद्यार्थ्यांना रुग्णालयातून घराकडे सोडल्याची माहिती मिळाली.
