भुसावळ, (प्रतिनिधी) : मुक्ताईनगरातील दोन जणांना गावठी कट्टा व दोन जिवंत काडतूस बाळगल्या प्रकरणी वरणगाव पोलिसांनी गोपनीय माहितीच्या आधारे अटक केली आहे. ही कारवाई वरणगाव शहरातील एका हॉटेल जवळ रविवार दि. २२ सप्टेंबर ला करण्यात आली. याप्रकरणी वरणगाव पोलीस ठाण्यात दोघांवर गुन्हा दाखल करण्यात आला आहे.
वरणगाव शहरात संशयीत शस्त्रासह येणार असल्याची माहिती सहाय्यक निरीक्षक भरत चौधरी यांना मिळाल्यानंतर त्यांनी पथकाला कारवाईचे निर्देश दिले होते. दरम्यान वरणगाव पोलिसांनी रविवारी सायंकाळी ५ वाजता संशयित आरोपी सिध्दार्थ संतोष भालेराव (वय २३, डॉ. आंबेडकरनगर, मुक्ताईनगर) व अनिरूध्द कैलास ठाकूर (वय २०, सुराणा नगर, मुक्ताईनगर) यांना ताब्यात घेतले आहे.
संशयीतांच्या अंग झडतीत त्यांच्याकडून २५ हजार रुपये किंमतीचा गावठी कट्टा, ४ हजार रुपये किंमतीचे २ जिवंत काडतूस तसेच ५ हजार रुपये किंमतीचे मॅग्झीन जप्त करण्यात आले. पोलीस कॉन्स्टेबल मनोज म्हस्के यांनी दिलेल्या फिर्यादीवरून दोघांविरोधात वरणगाव पोलीस ठाण्यात गुन्हा दाखल करण्यात आला असून तपास पोलीस उपनिरीक्षक रामदास गांगुर्डे करीत आहे.
