अमळनेर, (प्रतिनिधी) : शहरातील गांधलीपुरा भागातील एका २८ वर्षीय महिलेचा खून झाल्याचा धक्कादायक प्रकार सकाळी १० वाजेच्या सुमारास उघडकीस आला आहे. याप्रकरणी अमळनेर पोलीस स्टेशनसह स्थानिक गुन्हे अन्वेषण विभागाचे पथक तपासाला लागले आहे.
शीतल जय घोगले (वय २८, रा. गांधलीपुरा, अमळनेर) असे मयत महिलेचे नाव असून ही महिला गांधलीपुरा भागात रिकाम्या जागेत मृत अवस्थेत पडलेली दिसून आली. तिला डोक्याला मार लागलेला होता तसेच तिच्या गळ्यावर आवळल्याचे व्रण तर डोक्यावर व हातावर वार केल्याचे दिसून आले.
घटनास्थळी डीवायएसपी सुनील नंदवाळकर, पोलीस निरीक्षक विकास देवरे, पोलीस उपनिरीक्षक नामदेव बोरकर, हेडकॉन्स्टेबल संदेश पाटील, गणेश पाटील, सागर साळुंखे, निलेश मोरे, जितेंद्र निकुंभे, अमोल पाटील, सिद्धांत शिसोदे, स्थानिक गुन्हा अन्वेषण पथकातील पोलीस उपनिरीक्षक दत्तात्रय पोटे, रवी पाटील, दीपक माळी, संदीप पाटील यांनी पाहणी केली. दरम्यान महिलेचे शव विच्छेदनसाठी ग्रामीण रुग्णालयात नेण्यात आले. पोलिसांनी विविध दिशेने तपास चक्रे फिरवायला सुरुवात केली आहे.
