वरणगाव, ता. भुसावळ : भुसावळ ते वरणगाव महामार्गावरील वेस्टर्न हॉटेलवरून रात्री चोरी गेलेल्या ट्रकप्रकरणी वरणगाव पोलीस ठाण्यात गुन्हा दाखल होता. या प्रकरणी पोलिसांनी केलेल्या तपासात फिर्यादी ट्रक चालकसह पोलिसांनी अन्य दोघांना बेड्या ठोकल्या आहेत. मात्र, चोरीला गेलेला ट्रक अद्याप जप्त झाला नसल्याचे पोलिसांनी सांगीतले. या सर्वांना न्यायालयात हजर केले असता ३ दिवसाची पोलिस कोठडी सुनावण्यात आली.
धरणगाव तालुक्यातील पाळधी येथील ट्रकचालक अरबाज खान तस्लीम (वय २७) हा त्याच्या ताब्यातील ट्रक (एमएच ४३, वाय- ८०८७) घेऊन भुसावळ ते वरणगाव महामार्गाने जात होता. वरणगाव नजिकच्या महामार्गावरील हॉटेल वेस्टर्नसमोर ५ सप्टेंबर रोजी चालक हा रात्री थांबला होता. मात्र, रात्री हा ट्रक चोरीला गेल्याचे सकाळी चालकाच्या लक्षात आले. त्यानंतर त्याने ही माहिती ट्रक मालकाला दिली.
याबाबत ८ रोजी वरणगाव पोलीस ठाण्यात फिर्याद दाखल करण्यात आली होती. या प्रकरणी पोलिसांनी तपासाची चक्रे फिरवली असता ट्रक चोरीच्या घटनेतील फिर्यादी चालकच आरोपी निघाला आहे. यात पाळधी येथील अरबाज खान तस्लीम व त्याचा साथीदार क्लिनर तस्लीम अयुब खान (वय ५४) तसेच जामनेर येथील युसूफ खान अमीर (वय ४८) यांना ११ रोजी अटक करण्यात आली. मात्र, या घटनेतील चोरीला गेलेला ट्रक अद्यापही पोलिसांना सापडलेला नाही. या प्रकरणाचा तपास पो.उ.नि. सुशिल सोनवणे करत आहेत.
