म्हसावद जळगाव रेल्वे स्टेशनदरम्यानची घटना
जळगाव | दि. ०७ ऑगस्ट २०२४ | काशी एक्सप्रेस या धावत्या रेल्वेखाली स्वतःला झोकून देत आत्महत्या केल्याची धक्कादायक घटना म्हसावद रेल्वे स्थानकाजवळ डाऊन रेल्वे लाईनवर आज दुपारी १ वाजेच्या सुमारास उघडकीस आली. याबाबत उशिरापर्यंत अकस्मात मृत्यूच्या नोंदीचे काम सुरु होते.
प्रियंका अरुण गोसावी (वय २४, रा. एकनाथ नगर, मेहरूण परिसर, जळगाव) असे मयत तरुणीचे नाव आहे. ती मेहरूणमध्ये एकनाथ नगरात परिवारासह राहत होती. तिचे जी.एच. रायसोनी इन्स्टिट्यूटच्या महाविद्यालयात एमसीएचे शिक्षण सुरू होते.दरम्यान बुधवारी दि. ७ ऑगस्ट रोजी सकाळी ती महाविद्यालयात गेली असल्याची माहिती मिळाली. तर आज दुपारी जळगाव तालुक्यातील म्हसावद ते डोमगाव रत्यालगत तिने तिची दुचाकी क्रमांक (एमएच १९ बीआर ६८८९) लावल्यानंतर म्हसावद गावालगत असलेल्या रेल्वे गेट जवळ रुळावर स्वतःला झोकून देत आत्महत्या केली.
कागदपत्रावरून पटली ओळख
दरम्यान रुळावरील गॅंगमनला घटना समजताच त्यांनी स्टेशन मास्तरला कळविले . त्यावरून रेल्वे दूरक्षेत्र पोलिसांनी घटनास्थळी धाव घेतली. घटनास्थळी तरुणीची बॅग, मोबाईल आढळले.त्यात महाविद्यालयाचे ओळखपत्र, पॅन कार्ड, आधार कार्ड अशी कागदपत्रे आढळून आली. त्यावरून तिची ओळख पटली. त्यानंतर एमआयडीसी पोलीस स्टेशनला देखील माहिती मिळताच पोहेकॉ प्रदीप पाटील, पोकॉ मनोज पाटील यांनी घटनास्थळी धाव घेतली.
पोलिसांनी तरुणीच्या नातेवाईकांना माहिती दिली असून दरम्यान मृतदेहाला शासकीय वैद्यकीय महाविद्यालय व रुग्णालयात दाखल करण्याचे काम सुरू होते. तरुणीने आत्महत्या का केली याबाबतची माहिती अद्याप स्पष्ट नाही.या घटनेची नोंद जीआरपी पोलिसांकडे करण्यात येत असून पुढील तपास रेल्वे पोलीस करीत आहे.
