जळगाव, दि.१७ – राष्ट्रवादी काँग्रसचे अध्यक्ष खासदार शरद पवार हे दोन दिवस जळगाव दौर्‍यावर होते. काल जळगाव येथे जिल्हाध्यक्ष अ‍ॅड.रविंद्र पाटील यांच्या निवासस्थानी खासदार शरद पवार यांची काँग्रेसचे प्रदेश उपाध्यक्ष डॉ.उल्हास पाटील व पदाधिकार्‍यांनी भेट घेतली. यावेळी खासदार शरद पवार आणि डॉ.उल्हास पाटील यांचे हात एकमेकांच्या हातात काही वेळ राहिले होते. आगामी लोकसभा निवडणूकांच्या दृष्टीने हे राजकीय हस्तांदोलन चर्चेचा विषय ठरले.
राष्ट्रवादीचे सर्वेसर्वा खासदार शरद पवार यांनी दोन दिवसाच्या जळगाव दौर्‍यात सर्वसामान्य कार्यकर्त्यांपासून ते विविध पक्षाच्या नेत्यांशी त्यांनी संवाद साधला. शुक्रवारी दुपारी ४ वाजता खासदार शरद पवार यांनी राष्ट्रवादीचे जिल्हाध्यक्ष अ‍ॅड रविंद्र पाटील यांच्या निवासस्थानी भेट दिली. खा.शरद पवारांना भेटण्यासाठी याठिकाणी नेते, पदाधिकारी व कार्यकर्त्यांची मोठी गर्दी केली होती.
तब्बल चार वर्षानंतर खा.पवार अन डॉ.पाटील यांची भेट..
खासदार शरद पवार आणि काँग्रेसचे प्रदेश उपाध्यक्ष डॉ.उल्हास पाटील यांची तब्बल चार वर्षानंतर एकत्रित भेट झाली. या भेटीत खा.शरद पवार यांनी ‘डॉक्टर काय सुरु आहे’ अशी विचारपूस केली. तसेच त्यांनी तयारी सुरु ठेवा असा सूचक सल्‍ला देखील डॉ.उल्हास पाटील यांना दिला. याप्रसंगी खा.शरद पवार यांचा हात डॉ.उल्हास पाटील यांच्या हातात हात होता. तसेच खासदार शरद पवार आणि डॉ.उल्हास पाटील या दोघांच्या चेहर्‍यावर स्मितहास्य होते.
खा.पवारांनी दिलेला सूचक सल्‍ला आणि राजकीय हस्तांदोलनाने उपस्थीतांच्या भुवया उंचावल्या. तसेच यावेळी उपस्थीत नेत्यांमध्ये हास्याचे फवारे देखील उडाले. सन २०१९ मध्ये डॉ.उल्हास पाटील यांना राष्ट्रवादीकडून लोकसभेसाठी ऑफर देण्यात आली होती. मात्र डॉ.उल्हास पाटील यांनी नम्रपणे त्यास नकार दिला होता. हे सारे असले तरी आगामी काळात होणार्‍या लोकसभा निवडणूकांच्या दृष्टीने खा.शरद पवार आणि डॉ.उल्हास पाटील यांच्या राजकीय हस्तांदोलनाची जिल्हाभरात चर्चा रंगली होती. यावेळी राष्ट्रवादीचे नेते माजी आमदार अरुणभाई गुजराथी, काँग्रेसचे जिल्हाध्यक्ष प्रदिप पवार हे उपस्थीत होते.
