गजानन पाटील | अमळनेर, दि.०६ – तालुक्यातील मांडळ येथे आज सायंकाळी झालेल्या परतीच्या पावसामुळे वीज पडून एक जण ठार तर चौघे जण जखमी झाल्याची घटना घडली.
याबाबत सविस्तर वृत्त असे की, आज दुपारच्या सुमारास अमळनेर सह तालुक्यात परतीचा पाऊस झाला. यात काही ठिकाणी तुरळक तर कुठे मुसळधार पाऊस पडला. दरम्यान मांडळ येथे विजांच्या कडकडासह मुसळधार पाऊस झाला. यावेळी शेतात काम करणारे आनंदा सुरेश कोळी वय ३५ यांच्या अंगावर वीज पडून ते जागीच ठार झाले, तर त्यांच्या परिवारातील दोन महिला व दोन मुलं अशी चार जण देखील जखमी झाले आहेत.
जखमी मध्ये त्यांची पत्नी प्रतिभा कोळी, मुलगा प्रशांत कोळी, राज कोळी व सासू लटकन कोळी यांचा समावेश आहे. विजांचा कडकडाट होत असताना ते आश्रयासाठी झाडाजवळ गेले होते तेंव्हा ही घटना घडल्याचे बोलले जात आहे. दरम्यान जखमींना तातडीने अमळनेर येथील ग्रामीण रुग्णालयात उपचारासाठी दाखल करण्यात आले.
