पारोळा, दि.२० – सद्यस्थितीत सर्वत्र पावसाची जोरदार सुरुवात असताना नद्या नाले ओसंडून वाहत आहेत. यातच तालुक्यातील पिंपळकोठे येथील फरशी पुलाची वाईट अस्वस्था झाल्याने पाऊस झाल्यास वाहतुकीला अडथळा येतो. दरम्यान रविवारी झालेल्या पावसाने येथील फरशी पुल ओसंडून वाहत असल्याने वाहतूक थांबली होती. तर सकाळी उशिरा पर्यंत पाणी कमी न झाल्याने शाळकरी मुलांना शाळेत न येता माघारी परतावे लागले.
रस्ता उंच फरशीपुल खोल..
अमळनेर मुकटी हा वाहतूक मार्ग चाळीसगाव, धुळे, पारोळा आदी जाण्यासाठी सोयीस्कर असून एस टी बस सेवा सुरळीत सुरु आहे. मागील पाच वर्षापासुन रस्ता पूर्णता डांबरीकरण झाला मात्र याच रस्त्यावरील पिंपळकोठे येथील फरशी पुल रस्त्यापासुन किमान पाच फूट खोल असल्याने थोडासा जरी पाऊस पडला तरी, या फरशी पुलावरून पाणी वाहते. यामुळे वाहतूक थांबते. यामुळे वसंतनगर, भोलाणे या गावाचा संपर्क तुटतो. तर वसंतनगर येथे शाळेत येणाऱ्या पिंपळकोठे येथील विध्यार्थ्याना याचा त्रास सहन करावा लागत असून वाहत्या पाण्यातून पालक जीव मुठीत धरून शाळेत मुलांना सोडतात.
रस्ता डांबरीकरण होऊनही या फरशी पुलाचे काम जैसे थे असल्याने नागरिकांमधून संताप व्यक्त होत आहे. रस्त्याचे काम होऊनही फरशी पुलाची उंची न वाढवता तशीच असून त्यावर मोठ-मोठे खड्डे पडले आहे. पावसाचे पाणी साचल्याने वाहनधारकाला त्याचा अंदाज येत नाही. लोकप्रतिनिधींनी तात्काळ लक्ष घालून समस्या सोडवावी अशीही मागणी होत आहे.
