जळगाव, (प्रतिनिधी) : महावितरणच्या जळगाव परिमंडलाचे पालकत्व असलेले कार्यकारी संचालक धनंजय औंढेकर आणि मुख्य अभियंता आय.ए.मुलाणी यांच्या निर्देशानुसार परिमंडलात विजेच्या अवैध वापराविरुध्द मोहीम राबविण्यात येत आहे. त्या अंतर्गत चोपडा आणि अमळनेर उपविभागातही सातत्यपूर्वक मोहीम राबविण्यात येत आहे. मोहीमेत १४५० वीज मीटरची तपासणी करण्यात आली. त्यात २०३ सदोष मीटर धारकांवर भारतीय विद्युत कायदाप्रमाणे कारवाई करण्यात आली आहे.
धरणगाव विभागाअंतर्गत दि. १५ जानेवारी रोजी चोपडा आणि अमळनेर शहरात विशेष मीटर तपासणी मोहीम राबविण्यात आली. त्यासाठी अमळनेर शहरात २० पथके व चोपडा शहरात १८ पथके असे एकूण ३८ पथके तयार करण्यात आली होती. त्यासाठी एकूण १९० कर्मचारी सहभागी होते. अमळनेर शहरामध्ये एकूण ८५० मीटरची तपासणी करण्यात आली. त्यापैकी ११६ मीटरमध्ये फेरफार व छेडछाड करुन वीज चोरी झाल्याचे आढळून आल्याने कलम १३५ प्रमाणे कारवाई करण्यात आली. त्याप्रमाणे चोपडा शहरात एकूण ६०१ मीटरची तपासणी करण्यात आली आहे. त्यापैकी २०३ ग्राहकांवर दंडात्मक कारवाई करण्याची प्रक्रिया सुरु आहे.
विजेची वितरण व वाणिज्यक हानी अधिक असणाऱ्या भागात वीज चोरीला आळा घालण्यासाठी परिमंडलात ग्राहकाच्या दारावरील वीज मीटर काढून ते रस्त्यावरील विजेच्या खांबावर बसविण्यात आलेल्या ‘मल्टी मीटर बॉक्स’मध्ये बसविण्याचेही काम सुरु आहे. ते काम जळगाव, धुळे आणि नंदुरबार जिल्ह्यातही सुरु आहे. त्यानुसार गत सप्ताहात शहादा विभागात (नंदुरबार) ६०० तर तळोद्यात ५० मीटर घराऐवजी मल्टी मीटर बॉक्स मध्ये बसविण्यात आले आहेत. मल्टी मीटर बॉक्स म्हणजे विजेच्या खांबावर बसविण्यात आलेल्या एका मोठ्या पेठीत अनेक वीजमीटर बसविणे होय. जळगाव मंडल कार्यालय क्षेत्रामध्येही सदर मल्टी मीटर बॉक्स बसविण्याचे सूचना संबंधित विभागांना देणेत आलेल्या आहेत.
