जळगाव, दि. 08 – सन 2020 पासून कंत्राटदारांनी केलेल्या कामांचा रखडलेला निधी तात्काळ द्यावा, या मागणीसाठी बिल्डर्स असोसिएशन ऑफ इंडिया तर्फे शुक्रवारी जळगावात सार्वजनिक बांधकाम विभागाच्या कार्यालयासमोर निषेध आंदोलन करण्यात आले. दरम्यान सार्वजनिक बांधकाम विभागाचे अधीक्षक अभियंता यांना मागण्यांचे निवेदन देण्यात आले.
करोडो रुपयांची देयके राज्य शासनाकडे प्रलंबित असताना केवळ 20 ते 25 टक्के निधी देऊन कंत्राटदारांची चेष्टा केली जात असून आर्थिक नियोजन नसताना नवीन कामांच्या निविदा काढल्या जात आहे. त्यामुळे कंत्राटदार आणखीनच अडचणीत येतील अशी प्रतिक्रिया असोसिएशनचे सचिव अभिषेक कौल यांनी दिली.
तसेच केलेल्या कामांचा रखडलेला 100 टक्के निधी तात्काळ न मिळाल्यास साखळी उपोषण करण्यात येईल असा इशारा यावेळी देण्यात आला. यावेळी बिल्डर्स असोसिएशन ऑफ इंडियाचे अध्यक्ष संजय पाटील, सचिव अभिषेक कौल, सहसचिव शिवाजी भंगाळे, खजिनदार वीरेंद्र पाटील यांच्यासह जिल्ह्यातील शासकीय कंत्राटदार मोठ्या संख्येत उपस्थित होते.
